Новости по тегам

«Нельга павялічваць падатковую нагрузку на бізнэс»

Асобныя змены і дапаўненні ў Падатковы кодэкс Рэспублікі Беларусь, якія ініцыюе Міністэрства фінансаў, з'яўляюцца, на мой погляд, немэтазгоднымі, бо прывядуць да пагаршэння ўмоў вядзення бізнэсу ў краіне. Прааналізаваўшы праект Закона «Аб унясенні змяненняў і дапаўненняў у Падатковы кодэкс Рэспублікі Беларусь», прапаноўваецца скарэктаваць негатыўныя моманты, якія змяшчаюцца ў дакуменце.

Па-першае, гэта павышэнне стаўкі падатку на дададзеную вартасць з 20% да 22%. Такі крок павялічвае падатковую нагрузку на суб'екты гаспадарання і, у канчатковым рахунку, на небагатае насельніцтва Рэспублікі Беларусь. Раней планавалася, што рэальная зарплата да канца 2015 годзе будзе складаць $1000, аднак праектам Канцэпцыі прагнозу сацыяльна-эканамічнага развіцця Рэспублікі Беларусь на 2015 год і да 2017 года, распрацаваным Міністэрствам эканомікі, рост намінальнай зарплаты па рэспубліцы ў наступныя 4 гады запланаваны толькі да $763 (у тым ліку ў бюджэтным сектары - да $606). Такім чынам, зарплата ў $1000 у месяц пакуль засталася марай, а значыць, павышаць падатковую нагрузку на насельніцтва няма падставы.

Па-другое, негатыўна адаб'ецца на развіцці малога бізнэсу прапанаванае павелічэнне стаўкі падатку пры спрошчанай сістэме падаткаабкладання (ССП) без выплаты ПДВ з 5% да 7%. Бо планамі Урада прадугледжвалася павелічэнне долі малога і сярэдняга бізнэсу ў ВУП да 30% у 2015 годзе і да 50% у 2020 годзе, а як раз ССП і з'яўляецца найбольш масавым і прывабным падатковым рэжымам для малога бізнэсу.

Па-трэцяе, прапанаванае павелічэнне падатковай нагрузкі па выплаце арэнднай платы за зямельныя ўчасткі і зямельны падатак пры ССП ўскладняе ўлік і робіць дадзеную сістэму падаткаабкладання менш прывабнай для малога бізнэсу.

Па-чацвёртае, Міністэрства фінансаў прапануе дапоўніць пункт 5 артыкула 286 Падатковага Кодэкса Рэспублікі Беларусь пунктам 5.7., які забараняе прымяняць ССП камерцыйнымі арганізацыямі, у статутным фондзе якіх акцыі (долі) іншых камерцыйных і (або) некамерцыйных арганізацый складаюць больш за 25 працэнтаў (у тым ліку сумарна - пры наяўнасці некалькіх акцыянераў, (удзельнікаў)). Пры гэтым не ўлічваюцца акцыі (долі) у статутным фондзе камерцыйных арганізацыі, якія належаць Рэспубліцы Беларусь або яе адміністрацыйна-тэрытарыяльным адзінкам. Беларускі саюз прадпрымальнікаў катэгарычна супраць дадзенага абмежавання для прымянення ССП, бо яно стварае для суб'ектаў прадпрымальніцтва няроўныя ўмовы канкурэнцыі па складзе заснавальнікаў і форме ўласнасці, што супярэчыць п.1 Дырэктывы № 4 і арт.13 Канстытуцыі Рэспублікі Беларусь.

Па-пятае, у праекце змяненняў у падатковае заканадаўства не ўлічаны пункт 4.4. Дырэктывы № 4 - аб рэгулярным пераглядзе гранiчнага памеру выручкі для прымянення ССП з улікам істотнай штогадовай інфляцыі, якая перавышае 16% у год. Пры павелічэнні ставак падатку таксама аўтаматычна неабходна індэксаваць мяжу выручкі для прымянення ССП.

І, нарэшце, нельга ўводзіць прадугледжаныя ў арт. 103 праекта Закона палажэнні, якія абавязваюць плацельшчыка вяртацца ў мінулыя падатковыя перыяды з мэтай вылічэння і выплаты падаткаў па мінулым варыянце падатковай сістэмы. Гэта істотна ўскладніць працу, павялічыць працаёмкасць і часовыя затраты бухгалтарскіх службаў. Акрамя таго, плацельшчыкі вымушаныя будуць выплачваць пеню за прадстаўленыя удакладненыя падатковыя дэкларацыі ў выпадку павелічэння падаткаабкладальнай базы.

Аляксандр Калінін, старшыня ГА «Беларускі саюз прадпрымальнікаў»