Навіны савета

Сяргей Навіцкі: "Мы павінны павялічыць эфектыўнасць нашых прадпрыемстваў"

Сяргей Навіцкі, намеснік старшыні Савета па развіцці прадпрымальніцтва, прыняў удзел у праграме «Галоўны эфір» на канале «Беларусь-1» 4 мая 2014 года. Тэмай размовы былі чаканні беларускага бізнесу ад еўразійскай інтэграцыі.

- Сучасныя тэндэнцыі звязаныя са стварэннем эканамічных саюзаў - усяго іх каля 280 па ўсім свеце. Яны ствараюцца, каб забяспечваць больш высокую канкурэнтаздольнасць краін, якія ўваходзяць у гэтыя саюзы. Таму, калі казаць пра Мытны саюз і пра будучы Еўразійскі, то, на мой погляд, тут вельмі добрыя перспектывы ствараюцца ў тым ліку і для нашага бізнесу, бо саюз прадугледжвае свабоднае перамяшчэнне тавараў, паслуг, капіталу і грамадзян паміж трыма краінамі.

У той жа час Сяргей Навіцкі адзначыў, што беларускім прадпрыемствам трэба, разглядаючы агульны рынак Расіі, Казахстана і Беларусі з пазіцыі заваёўнікаў, не забываць пра ўнутраны рынак, дзе таксама становіцца больш жорсткай канкурэнцыя.

- Мы павінны павялічыць эфектыўнасць нашых прадпрыемстваў і максімальна палепшыць якасць нашых тавараў і паслуг. Гэта адзіны шанец.